Preaload Image

محمد زقزوق مواليد برج الثور أول يوم في شهر مايو .. إتولدت وعشت في حي السيدة زينب أجدع أحياء القاهرة أثر فيا كتير وأتعلمت منه أكتر عشت فيها 15 سنة من عمري بعد كده ابويا الله يرحمه نقلنا حي المعادي حيث الأشجار والعيشة الرغيدة ( مش أوي كده ) المنطقة اللي انا ساكن فيها شعبية برضة وعادية جداً يعني انا مش من عيال المعادي الفرافير زي ما كتير فاكرين أو في بقي معلقة دهب وبفرتك الفلوس وبلعب بيها .. بالعكس .. عيشتي كانت صعبة مريت انا وأسرتي بظروف وحشة كتير يمكن كانت سبب في نشأتي وإني أطلع بحب الصعب وبتحداه وأسعي لحلمي لأخر نفس فيا

أتربيت في بيت هادي لإني الإبن الوحيد لأمي ولأبويا .. أجمل أيام قضيتها لما ابويا كان عايش .. وبعد وفاته .. الحياة بدأت تصعب كل يوم , فجأة لقيت نفسي لوحدي .. مطلوب مني أبقي راجل وانا سني 19 وأشيل مسئولية .. ( نفسي ) علي الأقل

نرجع بقا بالأيام 17 سنة من دلوقتي .. أيام الكحرتة زي مابيقولوا .. أبويا العزيز جابلي كمبيوتر وانا في تانيه إعدادي حبيته جداً طبعا لإني وحيد فمعنديش غيره كان ونسي وصديقي واخويا قضيت عليه أمتع أوقات أتعلمت عليه كل اللي اعرفه في حياتي

ًفي الوقت ده مكنش فيه انترنت ولا مصادر تعليمية أقدر أتعلم منها كان موجود حاجة واحدة بس كنت دايما بسعي إنها تكون عندي .. مجلات الكمبيوتر .. إصدار كل شهر .. زي مجلة لغة العصر مثلاً .. وقتها كانت بـ 10 جنية وانا مصروفي نص جنية وساعات جنية .. كنت بحوش يومياً .. السي دي اللي مع المجلة كان عليه كنوز بالنسبالي .. برامج – العاب – صور وحاجات كتير .. كنت باخد الطريق جري عشان أتفرج وأشبع رغباتي الجائعة والمتعطشة للتكنولوجيا وفي طريقي للبيت المجلة من الجلدة للجلدة مقريه وخلصانة .. طبيعي .. لإن بيتي في المعادي ومدرستي في السيدة زينب والميكروباص أو المترو .. هياخدوا مش أقل من ساعة عشان أبقي في البيت .. وياسلام لو الطريق زحمة .. كنت بقرأ المجلة الجميلة دي في الوقت ده

من الصدف الطريفة إني إتعلمت فوتوشوب وإشتغلته 4 سنين من غير ما أعرف حتي أسمه إيه .. مكنتش أعرف غير إنه بيخليني ألعب في الصور وكنت بعمل بيه بلاوي وإبداعات خرافية ( طبعاً بتريق ) اصلاً فوتوشوب الاصدار الرابع كان بلح

مجموعي في ثانوي علي ما أتذكر 84% .. حلوين .. يادوب أعرف أدخل بيهم أي كلية ودخلت تجارة جامعة القاهرة

وزي مادخلت الجامعة زي ماخرجت منها ( حمار ) ولا فاهم أي حاجة غير إني إشتركت في مسرح الجامعة شوية أيام .. وكان المسرح لاموئخذه مش ولابد والحال مكنش عاجبني فسبته ونسيته .. يمكن عشان انا بحب شغل السينما أو التصوير أكتر ( يمكن ) أو يمكن عشان كان الجو حر ساعتها

إتخرجت محاسب محترم ( قد الدنيا ) ومعايا مادتين هامتحنهم دور سبتمبر .. مادتين محاسبة  .. محاسب وساقط في مادتين محاسبة .. طبعاً أي شركة تتمناني .. جاتلي واسطه من بعض الأقارب إني أروح مقابلة شغل في شركة بترول ( مرة واحدة ) أيون بترول .. ساقط مادتين ومحاسب في شركة بترول ( مفيش ألطف من كده ) رحت المقابلة وقعدت مع المدير المالي .. وهناك كانت المهزلة بحق

واضح إن الواسطه مكنتش تقيلة أو كانت تخليص حق .. المدير المالي كان عايز يرميني من الشباك ( حقه بصراحة ) الغريبة إني كتبت في مهارات الـ ( سي في ) فوتوشوب وماكس وفلاش وحاجات تانيه معرفش ليه .. والمصيبة إنه برضة مكتوب ( بخط صغير ) رمادي كده مش باين ساقط في مادتين محاسبة

الراجل ( صُعق ) يا عيني أول ماشافها وقالي بلهجة فيها سخرية علي شوية قلة ادب ( انت ساقط في مادتين محاسبة وجاي تشتغل محاسب ) ثم أنهال عليا بكمية أسئلة مهولة .. تقريباً كان حاسس إني ممكن اكون ساقط لكن موهوب في المحاسبة وللأسف خيبت ظنه طبعاً .. مفيش سؤال جاوبته صح .. ولما عينه وقعت علي المهارات في السي في أستغرب جداً وقالي .. انت كاتب ليه ؟ إنك بتعرف فوتوشوب وفلاش وماكس .. ماتروح تشتغل ( جرافيك ديزاينر ) أحسن .. صدقوني كانت أول مرة أسمع فيها المسمي الوظيفي ده .. الكلمة عجبتني .. كان وقعها علي أُذني مثل السيمفونية أو السيمون فيميه مش هاتفرق .. ومن طبعي إني مش بحب أسئل .. أحب أدور علي الإجابة بنفسي

بمجرد ماخرجت من الشركة دخلت انترنت كافيه وفتحت جوجل بحاول أعرف يعني جرافيك ديزاينر وبيعمل إيه .. أكتشفت إن كل اللي انا بعمله يصلح لأن أكون مشروع جرافيك ديزاينر ناجح .. بلاش تستغربوا ..  دي كانت مجرد هواية .. مكنتش أعرف إنها في يوم هاتكون شغلتي ولا كنت أتخيل إني قاعد بكتب الكلام اللي بتقراه دلوقتي .. وبعد أقل من أسبوعين نفس الشركة كلموني وقالوا إنهم محتاجين الشغل اللي انا بعمله ( الويب ديزاين ) رحت تاني وعملت مقابلة تاني .. بس المرادي مع الراس الكبيرة .. وكان أول ويب سايت أعمله في حياتي هو الويب سايت بتاعهم

وفي يوم ( أمي ) رجعت من شغلها ومعاها جرنال الوسيط وراحت رمياه بعيد بعدم اهتمام وقالتلي شوف كده يا ميدو ( بتشتم تقريباً ) كاتبين الحاجات اللي انت بتعرف تعملها .. ماتقدم يمكن تيجي معاك ..  لقيت مكتوب مطلوب مصمم ويب وجرافيكس لشركة تعمل في مجال الويب ديزاين .. خدت الايميل بتاعهم وبعت السي في ومعاه شوية شغل كده

كلموني بعدها بيومين وكان إنترفيو ناجح جداً .. وبعد كام يوم أتصلوا بيا ( انت معانا وهاتبدأ شغل الأسبوع الجاي ) .. وقد كان .. ودي أول شركة أشتغل فيها كـ مصمم ويب .. صممت خلال سنة ونص فيها أكتر من 150 ويب سايت .. وأكتر من 30 بريزنتيشن بالفلاش ( الله يرحمه ) وخلال ما انا موجود في الشركة دي طورت نفسي وذاكرت موشن جرافيكس .. وخرجت منها معايا سي في محترم في عالم الويب وكام بروجيكت في الموشن جرافيكس

بعدها اشتغلت في شركات كتير كـ موشن جرافيك ديزاينر عملت شغل مع مؤسسات ضخمة خارج مصر زي وزارة السياحة ووزارة التعليم العالي ووزارة الحج بالسعودية وهيئة الأمر بالمعروف وقنوات فضائية سعودية ويمنية وداخل مصر عملت شغل لبنك مصر ولقناة الراية وكتير من الشركات فتحت شركتي الخاصة لكن قفلتها بعد سنة واحدة مكنش معايا فريق محترم من للأسف .. قفلتها وبقيت فري لانس لحد مانزلت شغل في شركات تاني وجدير بالذكر إني أشتغلت كريتف دايركتور في شركات كتير لأكتر من 4 سنين طورت شركات وكنت مؤسس لبعضها

 .. وفي يوم خدت قراري
.. أنفرد بنفسي .. وأسس شركتي الخاصة من جديد .. بس المرادي أونلاين

زاك وركس هي شركتي الجديدة متخصصة في إنتاج كورسات في كل مجالات الجرافيكس ودروس وورش عمل بتجيب من الأخر .. وكمان شو ( زاك توك ) ع اليوتيوب .. هنا هتلاقي كل شغلي وكل حاجة عني .. هتلاقي مصدر يساعدك تطور مستواك .. هتلاقي كورسات متكاملة وشرح مهني مش أكاديمي .. عشان تبدأ المجال اللي بتحبه وتقصر عليك الطريق

وبعد كل الرغي ده أتمني إني أكون وصلتلك جزء بسيط من حياتي اللي مليانه أحداث حكيتها واللي لسه هاحكيها في الصفحة دي وكل فترة هتلاقي قصص جديدة .. أتمني إن زاك وركس يوصلك لهدفك واللي بتتمناه .. وأنه يسهل اللي كان صعب بالنسبالي في يوم من الأيام ويكون مصدر إلهامك .. محمد زقزوق